Jeanne Maillotte - Alexandre Desrousseaux

Un n’ séquoi qui m’ tripotte,

Ch’est qu’ jamais, Brûl’-Mason,

N’a fait sur Jeann’-Maillotte,

Un p’tit couplet d’ canchon.

Pourtant, cheull’ cabar’tière

Méritot bien ch’l honneur,

Car, comme eun’ vrai’ guerrière,

Elle a moutré du cœur.

L’histoire d’ Jeanne-Maillotte

N’est point moins biell’ qu’eune aute,

Et vous direz,

Quand vous l’ sarez,

Qu’ell’ mérit’ vingt couplets.

Maillotte étot l’hôtesse

Des confrèr’s Sébastien,

Exerçant leu-z-adresse

à tirer d’ l’arc fort bien.

Au mitan d’eusse, ell’-méme

Avot l’honneur du : JO !!!

Car on a vu cheull’ femme

Abatt’ souvint l’ojeau.

(refrain)

Volant s’imparer d’ Lille,

Les Hurlu’ , in hurlant,

Un jour, à pus d’ vingt mille.

Vienn’tent friant-battant.

Un Lillos, qui s’amusse

à vettier su’ l’ rempart,

Meurt d’un cop d’arquebusse

Qu’il a r’chu d’euss’, quéq’ part.

(refrain)

Cheull’ nouviell’ donn’ l’alarme,

Et met l’ vill’ sans sous d’sus.

Chaq’ femme n’ fait qu’eun’ larme,

Les hommes sont tout réus ;

On dit qu’un nommé Ph’lippe,

N’ pinsant pus qu’à s’armer,

A mêm’ laiché là s’ pipe

Sans finir de l’ feumer !

(refrain)

Veyant cha, Jeanne-Maillotte,

Avec tous ses archers,

Surnommés nul-s’y-frotte,

Vient su’ l’ Plache à Bleuets.

Ell’ fait cesser les plaintes,

Chaq’ femm’, dev’nant soldat,

S’arme d’un painnier d’ chintes

Pour courir au combat.

(refrain)

Et, n’aïant point pus d’ craintes

Qu’ nos zouav’s si résolus,

Chés femm’s vont j’ter des chintes

Dins les yeux des Hurlus.

Maillotte, avé s’n hall’barde,

In met tros chints d’ côté,

Et, sans pitié, les larde,

Comm’ de l’ chair à pâté.

(refrain)

Les Hurlus I’ peu qui reste,

Voyant qu’ cha va maj’mint.

N’ont point d’mandé leu reste

I’ sont partis viv’mint.

Nos guerrièr’s, vrai’s toutoules,

Glorieus’s d’avoir vaincu.

Criott’nt comm’ su’ des droules

« Hahu ! hahu !! hahu !!! »

(refrain)

On a ram’né Maillotte

In triomphe, à s’ mason.

On a fai’ eun’ ribotte

Pindant hui jours de long.

Et, r’devenu’ cabar’tière,

A les jeun’s comm’ les vieux,

Jeann’-Maillott’ servot s’ bière

Avé s’n air amiteux.

(refrain)

Comme un souv’nir, on garde,

à l’Administration

L’ biau portrai’ et l’ hall’barde

D’ cheull’ cabàr’tière in r’nom.

Eun’ nouvell’ que j’ai crue.

Ch’est qu’ laichant là ch’ tableau,

On mettra s’n estatue.

Sus l’ Marqué à p’tit viau !.

L’estatu’ d’ Jeann’-Maillotte

N’ s’ra point moins biell’ qu’eune aute,

Et vous direz,

Quand vous l’ verrez.

Qu’ell’ mérit’ chint couplets.

Publié en 1869 dans le recueil Chansons et pasquilles lilloises, tome 3.