L’canchon-dormoire - Alexandre Desrousseaux

Dors, Min p’tit quinquin,

Min p’tit pouchin,

Min gros rojin

Te m’fras du chagrin

Si te n’dors point ch’qu’à d’main.

Ainsi, l’aut’ jour, eun’ pauv’ dintellière,

In amiclotant sin p’tit garchon

Qui d’puis tros quarts d’heure, n’faijot que d’braire,

Tâchot d’l’ indormir par eun’ canchon.

Ell’ li dijot : Min Narcisse,

D’main, t’aras du pain n’épice

Du chuc à gogo

Si t’es sache et qu’te fais dodo !

Refrain

Et si te m’laiche faire eun’bonn’semaine

J’irai dégager tin biau sarrau,

Tin pantalon d’drap, tin gilet d’laine…

Comme un p’tit milord te s’ras farau !

J’t’acat’rai, l’jour de l’ducasse

Un porichinell’ cocasse,

Un turlututu,

Pour jouer l’air du Capiau-pointu…

Refrain

Nous irons dins l’cour Jeannette-à-Vaques

Vir les marionnett’s. Comme te riras,

Quand t’intindras dire : « Un doup] pou’ Jacques ! »

Pa’ l’porichinell’ qui parl’ magas.

Te li mettras din s’menotte,

Au lieu d’ doupe, un rond d’carotte !

I t’ dira Merci !…

Pins’ comme nous arons du plaisi !…

Refrain

Et si par hasard sin maite s’fâche,

Ch’est alors Narciss que nous rirons !

Sans n’n’avoir invi’, j’prindrai m’n air mache

J’li dirai sin nom et ses surnoms,

J’li dirai des faribolles

I m’in répondra des drôles

Infin un chacun

Verra deux pestac’ au lieu d’un.

Refrain

Allons serr’ tes yeux, dors min bonhomme

J’vas dire eun’ prière à P’tit Jésus

Pou’ qu’i vienne ichi, pindant tin somme,

T’fair’rêver qu’j’ai les mains plein’s d’écus,

Pour qu’i t’apporte eun’coquille,

Avec du chirop qui guile

Tout l’long d’tin minton,

Te poulèqu’ras tros heur’s de long !…

Refrain

L’mos qui vient, d’Saint’Nicolas ch’est l’fiête

Pour sûr, au soir, i viendra t’trouver

It’ f’ra un sermon, et t’laich’ra mette

In d’zous du ballot, un grand painnier.

I l’rimplira, si t’es sache,

D’séquois qui t’rindront bénache,

San cha, sin baudet

T’invoira un grand martinet

Refrain

Ni les marionnettes, ni l’pain n’épice

N’ont produit d’effet. Mais l’martinet

A vit’ rappajé l’ petit Narcisse,

Qui craignot d’vir arriver l’baudet

Il a dit s’canchon dormoire…

S’mèr’ l’a mis dins s’n ochennoire :

A r’pris sin coussin,

Et répété vingt fos che r’frain.

Refrain

Publié en 1869 dans le recueil Chansons et pasquilles lilloises, tome 2, Lille)