La Braderie - Alexandre Desrousseaux

(Air de l’Habit de mon Grand’Père ou Suzon sortait de son village.)

Sur un sujet vieux comme Hérode,

J’ vas vous dir’ des couplets nouviaux ;

Quoiqu’ sur un air qui n’est pas d’ mode,

J’espèr’ qu’i n’in s’ront point moins biaux.

Un homm’ qu’on r’nomme,

D’ Lill’ jusqu’à Rome,

Sur min sujet a fai’ un crain’ tableau ;

Chacun l’admire

Et n’ cess’ de dire :

Qu’ ch’est un fameux lapin que l’ pèr’ WATTEAU! (*)

Sans vous nommer m’ canchon, du resté.

Vous sarez d’ chin que j’ veux parler,

Quand vous allez m’intind’ crier :

Vite à l’Brad’rie! Au reste !!! (bis).

Awi, j’veux vous canter L’ BRAD’RIE !

Lille, ch’ jour-là, n’est qu’un marqué,

Car tous cheuss’ qui ont de l’vieus’rie,

S’ dépêch’t’nt à s’in débarrasser ;

Les pauv’s, les riches,

Vind’tent des q’miches,

Bonnets, giliets, mantiaux, cauche’ et sorlets ;

Capiaux, capotes,

écourcheux, bottes,

Et, pour mieux dir’, tous séquois bien bradés.

Les païsans sont les plus lestes,

A fair’ leus approvisionn’mints,

Quand il’ intind’nt crier chés gins :

Vite à l’Brad’rie ! Au reste !!! (bis).

Les Lillo’ ont l’ goût du commerce.

(Ch’est eun’ séquoi qu’ tout l’ mond’ sait bien)

Il arot biau pleuvoir à l’ verse,

Qu’ pou l’ Brad’ri’ clia n’ frot presque rien.

J’ai vu des filles

Vind’ des guenilles

Qui, l’velle incor, étott’nt au Mont-de-Piété ;

Et ches sossettes,

N’n acater d’s autes,

Et du mêm’ jour aller les ringager…

Au coin d’eun’ ru’, l’ graingnard MODESTE,

In montrant s’ femme et ses infants,

Criot d’ bon cœur à les passants :

Vite à l’ Brad’rie ! Au reste !!!

On fait des farce’ à pouffer d’ rire,

Quand on rincontre un vrai paour :

In v’ià un qui vient sans mot dire,

Un farceux va li dir’ : bonjour !

— Ch’est vous Nicole ?

Ah ! su’ m’ parole,

Je n’ pinsos point d’ vous rincontrer m’n ami.

D’un air tout bête,

Ch’ pacoul le r’vette.

Et l’aut’ li dit : « Nicol’ quemint va-t-i ? »

—Mais… cha va intre l’ ziste et l’ zeste,

(Répond ch’ brave homm’ d’païsan).

On li donne un grand renfonc’ment ! …

Vite à l’ Brad’rie ! Au reste !!!

Incore in train d’ rir’ de ch’l affaire,

Du coin de l’ ru’ des Banséliers*,

J’ vos v’nir des homme’, et puis, derrière,

Des femm’s, des fill’s, des marmouzets.

à leus paroles,

Leus airs si drôles,

J’ vos qu’i s’agit là d’un drôl’ de séquoi.

J’accoste Ignace,

Mais, l’ grand bonnasse,

M’ dit tout bêt’mint : J’ ris sans savoir pourquoi.

Je r’marque alors un homme in veste,

Et j’ vos qu’on ovot su’ sin dos,

Avec du blanc, marqué ches mots :

Vite à l’Brad’rie ! Au reste !!!

Pour queq’s sou’ on a des défroques,

D’ quoi s’ fair’ des drôlls d’accoutermints,

Ch’n’est point brillant, car ch’n’est qu’des loques,

Mais ch’est tout d’mêm’ des déguis’mints.

Pour faire l’rince,

On s’ mé’ in prince,

Ni pus ni moins qu’si ch’étot l’ carneval :

Des dintellières

S’ mett’nt in bergères,

Et, l’ long de l’ ville, i fait’tent baccanal.

Ch’est à qui f’ra l’ pus drôl’ de geste,

Avec sin costume à tassiaux ;

Ch’est à ch’ ti qui crîra l’ pus haut :

Vite à l’Brad’rie ! Au reste !!!

Ah ! mon Dieu, qu’elle est drôl’cheull’ fiête !

Mais pour faire eun’ pareil’ canchon,

Je n’ vous l’ cach’ point, vraimint, je r’grette

D’ n’avoir point l’esprit d’ BRÛLE-MASON.

Ch’ Lillo’ habile,

Qui n’n a fait mille,

Ch’est comme un sort, i n’a point fait cheull’-là.

Mais, faut’ de l’ sienne,

J’ vous offre l’ mienne,

L’ pus biell des fille’ n’ donn’ que chin qu’elle a.

Si m’ canchon fait l’effet d’eun’ peste,

Si vous s’ sauvé’ in l’intindant,

Vous n’arez qu’à l’ vinde in criant :

Vite à l’Brad’rie ! Au reste !!!

*La rue des Manneliers est encore communément appelée rue des Banséliers, du mot local banse, pour manne, grand panier. [note du poète ou de l’éditeur]

Date de publication inconnue dans le recueil Chansons et pasquilles lilloises, vol. 1.